--------------------------------------------------------------------------------

- عايز تسمع فؤاد لايف بجد ؟ .... تبقى حفلة SOLIDAIRE...

- عايز تشوف شياكة ف الاداء و اللبس ؟ تبقى حفلة SOLIDAIRE...

- عايز تسمع فرقة على اعلى مستوى ، و جمهور راقى جدا (من عشاق فؤاد فقط) ؟!!

يبقى طلبك منحصر ف حفلة SOLIDAIRE ...

- زعلان انك مروحتش ؟! .... ولا يهمك .... و هقولك ليه اخر الموضوع !



و نقول الحكاية من البداية ...


تذكرة الحفلة ب 150 جنيه ... و ب200 قدام المسرح

دخلنا الساعة 10 و فى جو من الترقب و القلق ... قاعدين منتظرين

بصراحة كان الخوف كله - بالنسبالى - من الجمهور ... لانك قدام عائلات ، اطفال ، و شباب ... قاعدين على ترابيزات ف هدوء تام ... جايين يسمعوا مش يهيصوا ... و الفرق كبير !

اذن الفؤش هنا ف مهمة صعبة ... لأنه هيغنى يعنى هيغنى ... و اى ظروف او مشاكل ف الهندسة الصوتية هتكون ظاهرة للناس تماما ... بكلمكوا بصراحة !

طبعا و كما عودنا فؤاد ف كل حياته انه لازم يتأخر ... معاده الساعة 11 ...

نستنى ل 12... فين فؤاد ؟.... مفيش فؤاد ...

ل1... فين فؤاد ؟ مفيش فؤاد ....

لحد 2:10 !!


كله استعد ... الفرقة جهزت ...



( لا لا لا لااااااا )

" يا حبيبى فينك" .......

اللذيذ ان الكل توقع دخول فؤاد من ورا المسرح .... بس فاجأنا انه بيغنى من برا الخيمة (مكان العربيات) ....

و دخل ف "انت بعيد ولا قريب" ... وسط مجموعة من الحرس و هتافات الناس و العائلات .... لحد ما حد شاله عشان يطلع على المسرح

"انا راجل حماسى ... لو الموضوع فضل كدة .... يبقى كدة" و شاور بأيده كأنه هيقع.....

دى اول كلمة قالها فؤاد - للجمهور على يمينه - فى (طيب طيب) ... لانه لقى الجزء دا نايم شوية ...

سقفوا طبعا جامد جدا ... و بدأوا يفوقوا ...

و كمل الكتش وصلة من الاغانى ....

و محدش يسألى غنى ايه جديد ... لانها نفس الليستة بتاعت كل حفلة ...

لكن المرة دى الموضوع مختلف... صوت رهيب ... قوى و نقى ... و الفرقة ف حالة ابداع مطلق

و السماعات قوية جدااا ......

عموما الاغانى بالترتيب :

فينك ، طيب طيب ، حيران ، شارينى ، انا لو حبيبك ، مشينا كتير ((اعجاز بكل ما تحمله الكلمه من معنى )) ، حبيبى يا ، كامننا


مفارقات الحفلة :

- قال كلمة عن (سمير صبرى) - اللى قاعد اودام المسرح على طول - " راجل قلبه طيب ... و تستمتع و هو بيحكى عن حياته " ...

- شكر (ابراهيم حسن) على حضوره و قاله " اومال فين حسام؟.... اوعى يكون ف حفلة تانية؟! "

- شاور ل(ممدوح موسى) المذيع ... - و استغربت من حضوره لانه صديق مقرب لعمرو دياب ... و سمعت انه قبل شارينى كان بيعيط ف قهوة مع صحابه لما عرف ان فؤاد نازل بالبوم جامد اوى هيهز السوق -

المهم ...

- و من الحضور بردو(محمد نجاتى) (السبكى) ، (ايمى) المطربة والعمدة و ملك (الصغيرة)

و نده فؤش للعمدة و ولد كدة (طفل معجزة)- فؤاد يعرفه عشان بيحضرله كل الحفلات- ... طلعوا هما الاتنين المسرح و غنوا حاجة للعمدة ...(فؤاد مشاركهومش الغنا و دا ذكاء كبير منه) ! ....


- أحد المعجبات طلعت لـــ فؤاد ع المسرح وباستو ... و قال " عشان كدة مبحبش اعمل حفلات ف رمضان"

كان دمه خفيف جدا وضحك الجمهور كذا مره ...

ولأول مره ...انفراد بالصوت والصوره .. خروج فؤاد من الحفله وسط تزاحم شديد من المعجبين والصحفيين .. لحد ما وصل لعربيته ... الناس فوق العربية و مش عارف يمشى ...و اللى ييسأله الالبوم امتى يا فؤاد ... و اللى عايز يتصور معاه .... كانوا هيموتوه لدرجة ان واحد قال " خلاص يا جماعة الراجل مش قادر " ... واحد رد عليه بصوت عالى " يا فؤاد دا حب يا فؤاد " ... فؤاد : "والله عارف يا حبيبى" ....

3 مذيعين من كذا قناة حاولوا يعموا معاه لقائات ف العربية و كله فشل بسبب الزحمة الغريبة و العجيبة ....