بسم الله الرحمن الرحيم
والصلاة والسلام علي أشرف المرسلين
مذكرات بطلب من عضو

طبعا يا جماعة في الأول أحب أقول إن فترة الثانوية العامة دي كانت تقريبا أحسن فترة في حياة أي واحد فينا ( وده كلام لا يختلف عليه اثنان ) طبعا أنا مش محتاج أقولكم ليه ؟ بس في الموضوع ده بناءا على طلب واحد من الأعضاء هحاول أبين ليكم سبب كلامي ده وطبعا الموضوع مفتوح للجميع علشان المشاركة يعني لو فيه موقف عند اي واحد منكم يكتبه هنا انما لو فيه سلسلة مواقف ( لا قدر الله ) يبقي يتحفنا بموضوع خاص بيه وبس :

سبب أن فترة الثانوية العامة هي أفضل فترة في حياة كل واحد مننا

طبعا بعد فترة الكبت اللي كلنا عشناها في المرحلة الإعدادية وتحكمات المدرسين والمدرسات وروح يا واد أنت وهوه هات طباشير من الفصل اللي جنبنا ومعملتش الواجب ليه ؟ طب فين يا حمار منك ليه الكتاب والكراسة بتاعتك ؟ طب أنت اتخانقت مع صاحبك ده ليه ؟ افتح أيدك يا خويا من ليه ..... إيه العصايا صعبة ؟ طب افتح أيدك تاني .... وكل يوم على ده الحال وبعد الامتحانات والمشاكل بتاعتها والنجاح وبل الشربات وبعد تحكمات الفراشين ومد الإيد وطلب الحلاوة يا بيه الحلاوة يا هانم وفي الآخر تحس انك بتطلب أسرار عسكرية من وزارة الدفاع ويدخل الفراش غرفة المدرسين ويرجع شايل في أيده ورقة ملهاش أي قيمة وتكتشف إن دي النتيجة بتاعة حضرتك ...... مبروك يا واد النتيجة بتاعتك ظهرت ومجموعك يدخلك ثانوية عامة !!!! لولولولولولولولولولوي ..... ألف مبروك يا ابني .... ألف مبروك يا بنتي ...شدوا حيلكم بقي في الثانوية العامة المدرسين هناك هيحبوكم وهيخافوا عليكم بس انتوا اسمعوا الكلام وذاكروا كويس وربنا معاكم وتدخوا بعد كده كليات كويسة إن شاء الله وترفعوا راسنا في وسط الناس .
( اكيد اللي هيقرأ الكلام ده وخصوصا اخر سطرين هيقعد يفتكر الزل اللي كان بياخده والكلام اللي مش لذيذ خالص وهوه فاتح ايده وبيقول لباباه أو مامته عاوز ادفع الفلوس بتاعت الدرس علشان المدرس هيطردني )
طبعا أنا حسيت إن أنا في فيلم رعب بعد تعب الأعصاب ده كله , وأبوك وأمك بيدوك النصائح وكأنك داخل حرب مش مدرسة بس برضه الواحد بيقول ايه يعني ؟ اهي ايام وهتعدي زي غيرها وما كنش عارف االمصيبة السودة اللي راحلها برجليه .
جينا بقي للثانوية العامة فترة المراهقة والشياطين تخرج من جحورها , طبعا تدخل الفصل تلاقي في ناس بتتعرف على ناس وناس بتتكلم مع ناس وأنت واقف بين دول و دول وكأنك من كوكب تاني بس بتقول يمكن الناس دي عارفة بعض من زمان وأنا أكيد شوية كده وهاخد عليهم وهما هياخدوا عليا ونبطل نعض في بعض , قشطه إيه اللي أنا شايفه ده ؟ ده فيه بنات في الفصل !!!! أنا شكلي هحب الثانوية العامة دي بجد ( طبعا اللي كان في الإعدادية في فصل مشترك مش هيعرف إحساس إنك تبقي في فصل واحد مع بنات ) !!!!!

المهم طبعا من أول يوم الواحد بيدخل الفصل بيبقي عنده إحساس جامد جدا إنه خلااااااص مرحلة التحكمات عدت , يعني الواحد بيكون وصل لمرحلة إن سنه بقي خلاص 15 سنة ( السن بتاعة الرجولة ) ومفيش حد يقدر يهز شعره في راسه وأنا خلاص يا جماعة كبرت ومحدش ليه كلمة عليا ( وبرضة الأفكار ما تخلاش من بعض التفكير الشيطاني الخاص بتجربة ذلك الاختراع العجيب المسمي بالسيجارة ) وده هنخليه لوقته وممكن نتغاضي عنه لو الناس رفضت الكلام عن الاختراع العجيب ده .

طبعا يا جماعه دي اول حلقة في سلسلة مغامرات في الثانوية العامة وطبعا مش هتكمل غير لما اعرف ردودكم ونشوف برضه لو حد عند مواقف وطرائف من الثانوية العامة ونخليه موضوع ذكريات بقي

مستني الردود يا جماعه علشان نعمل حاجه زي مسلسل كده


ودمتم

regards

مبررررررررررررررررررررروك على افتتاح القسم يا دانى ومبروك لينا احنا كمان
الموضوع جميل بجد

انا بئا مكنتش فى ثانويه عامه انا كنت فى ثانوى تجارى خمس سنوات
وما ادراك انك تعد خمس سنين فى ثانويه حاجة صعبه جدا انك تكون لسه فى ثانوى ولابس اليونيفورم بتاع الثانوى خمس سنين واصحابك اللى فى سنك لابسين لبس جامد وراحين الجامعه وبتاع وانا لسه بررروح المدرسه
كانوا خمس سنين شقاء وعذاب بجد كنت حسه انى واخدة تابيدة ومش هخلص

واول موقف حصلى فى الثانويه فى سنه اولى
كانت المدير ة قرفانه اوى من الدفعه بتاعتنا فعملت ايه فى امتحانات اخر السنه قالتلنا مفيش حد هينجح وفعلا جبت ملحق دين تخيلو ودة اول عذاب كان فى التابيدة بتاعتى

تسلم ايدك يا مووووووووووووووووووووني



وتسلمي علي المشاركة




بس عاوزين نعرف المديرة كانت قرفانه من ايه ؟


عاوزين رغي ورغي ورغي


عاوزين كل حاجة بالتفصيل


نورتينااااااااااااااااااااااااااا

تسلم ايدك يا دانى على الموضوع التحفة يا تحفة
وربنا يكفينا شلر الثانوية العامة
وانا لسة معنديش مواقف فيها عشان لسة مدخلتهاش
اوعدك اول ما ابدا
هتلاقى مواقف بالهبل فى الموضوع دة
اصبر يعنى
وربنا معايا ادعولى

ايه الشرررررررررر اللي بينط من الكلام ده


ده انتي ناوية بقي


عموما يا باشا ربنا معاكي


ومنوراني دايما يا جميل


وفي انتظار مواااااااااااااااضيعك

مبروك دانى على القسم


ومشكور كتير على الموضويع الجميله دى ويارب كده ديما الى فى المقدمه


وانا شايف ان الموضوع ده جامد جدا

بس الثانويه العامه دى مفروض من اسمها رحله تعلمى

لا دى اسمها رحلة عذاب مع انى انا مكنتش مهتم بااى حاجه


وبحب التنفيض عادى


ومعندى اى مواقف الحقيقه لانى انا مكنتش بروح الا وقت الامتحانات بس

شكرا دانى على الموضوع الجميل

بجد يادانى الموضوع جامد

اوى اخر حاجة يعنى

بس انا مش عارفة افتكر حاجة معينة

احكيها

بس كل الى انا فاكراة الى كنت بعملو فى المستر

بتاعى بتاع المحاسبة

بزات اما كان بيجيلى البيت فى الدرس

كان خلاص الود ودو يجرى ورايا فى الشقة

مكنتش بخلية يقول كلمتين على بعض

كان كل اما يقول حاجة كنت قبلو بشرحها

والعيال مكنتش طايقانى لانو المستر كان

لسة بيشرح الدرس هى عارفة الحاجات دى

منين ولانهم كمان فشلة ودة المعروف على

طلبة مدارس السياحة

فاكانو بيستغربو على ان فى حد بيزاكر

انا بقى كنت ببقى عارف الحاجات دى لان المدرس

دة كان هو الى بيدينى فى الكلاس فا كنت عارف طريقة

شرحو وترتيبو وهيقول اية امتى الشغل

بس عمرى ماحبيت مدرس ولا مدرس حبينى زيو

بجد كان شخصية اخر احترام

فعلا القط مش بيحب الا خناقو

هههههههههههههههههههههههههه

وفى موقف كمان اخر سنة المدرسة عندنا

كانو بيعملو حفلة تخرج لاوئل الطلبة

وانا طبعا كنت من الاوئل (76 % )

شوفتو الهنا

هههههههههههههههه

وطبعا لبسونا الوشاح الاسود والبارية الاسود

حسيت انى متخرجة من كلية الطب ياولاد والله

احساس تانى وانت على الاستيدج

وحد بيكرمك بيجد احساس عالى انك تكون تعبت بجد

وحد قدر مجهودك دة

المهم وانا باخد الشهادة بتاعتى

كان المفروض ان فى صاحب المدرسة والمدير

وحبة ناس كدة من الادارة التعليمية كدة

رسوم المنظر يعنى

والمفروض انهم وراء زى ترابيزة كدة

والمفروض انى اعدى من قبل الترابيزة وتبقى بينى وبينهم

انا بقى اية روحت معدية من جنبهم وبعدت عن الترابيزة خالص

وكان المفروض برضو انى احتلااما ليهم انى اسلم عليهم كلهم

لا انا بقى سللمت على مدير المدرسة بس عشان هو

الى كان معاه الشهادة

ههههههههههههههههههه

والباقى سيبتو مشيت

بجد موقف قمة فى الكسوف

مكنتش فاهمة حاجة كنت حاسة انى مكسوفة اوى

وتحس كدة ان الناس كلها بتتفرج عليك

موقف يع يع يعنى

بس كدة كفاية عليكم ولو افتكرت حاجة تانى

اكيد هاجى ولا عندك مانع يااستاذ دانى

جامد التوبيك والقسم كله بجد

سورى على التأخير يا دانى

وبجد حلوة المواقف كلها يجماعة

والله انا لما حد بيسالنى ندمانة على ايه
بقول انى ذاكرت كويس فى الثانوى العام


اه والله بجد لما دخلت الكلية حسيت انهم مكبرين المواضيع
وصورولنا ان الجامعة دى جنة بجد لو جبت مجموع ودخلتها كده عديت يا معلم
وطبعا من اول احتكاك بينى وبين الكلية وما تحتويه من بشر وتحف
كانت الصدمة الكبيرة عرفت بقى ان انضحك علينا
اصلها نفس الدولة يعنى ثانوى كلية حضانة هى هى متفرقش
يالا اللحمد لله الواحد عداها وكرهها وكله تمام

نكمل بقي يا جماعه




جينا بقي للحصة الأولي ... يا سلام !!! مين العبقري اللي داخل علينا ده ؟ اسكت ياض منك ليه بطلوا كلام وتنطيط علي الأدراج ... الراجل ده شكله مهم وتحس وهوه داخل كده عليك انه ليه هيبة علي رأي الظريف ( محمد هنيدي ) وطبعا يتساءل سائل من الحاضرين مين ده يا جماعة ؟ بس الحمد لله العبقري يعفينا من مهمة البحث في المكتبات والكتب التاريخية اللي بتتكلم عن العظماء .... ويدخل يسلم ويقول بصوت جهوري واضح المعالم مجهول المخارج .... أنا يا ولادي مدرس اللغة العربية بتاعكم !!!! الحمد لله أتحلت ألغاز الكون قدامنا ... وطبعا ولا واحد مهتم بشخصية هذا الكائن الأسطوري الذي طالما تحدث عنه الناس .... مدرس يعني إيه مدرس هوه أحنا جايين هنا علشان واحد يدرس لينا ؟ لا يا بابا إحنا جايين نلم شوية درجات ونخلع على اللي بعده ونعدي بقي .... يعني كفاية مدرسين ... تعليم إيه اللي انتوا جايين وفاكرين إن إحنا مهتمين بيه ؟ .... لا يا عم مش إحنا اللي يتقال عليهم تلاميذ ... إحنا خلاص بنودع التعليم وجايين هنا رحلة وخلاص هنتفسح في الفصول ونقضيها هنا وهناك وبعد كده ندخل علي الجايزة الكبيرة .... الكليات يا حلاوة وعيشة الحرية والتنطيط في القطورات والميكروباصات والسهر بالليل لغاية الصبح .... نرجع لحصتنا بقي :


- بص قدامك منك ليه يا جحش ؟ طبعا دي أول كلمة تخرج من فم المدرس بعد كتابة التاريخ وعنوان الدرس .... الله الله هوه إحنا مش هنخلص من الكلام ده بقي ولا إيه ؟ عموما اهو بيعمل منظر برضه وكلها يومين ويعقل ويعرف إن إحنا بقينا رجالة ومش بنتشتم بالسهولة دي !!!
- قوم يا حماااار أنت وهوه اطلعوا بره الفصل ... طبعا دي تاني كلمة تخرج منه بعد ما شاف فاصل من الضرب على القفا يدور بين أتنين صحاب .... هوه إحنا نخلص من الضرب يبقي فيه طررررد هوه إحنا في ملعب كان ناقص يطلع لنا الكارت الأحمر... طبعا يقوم العبد لله وواحد صحبه في درج قبله يخرجوا وقفاهم يقمر عيش يأكل الفصل كله ...
- ولا يهمك ياض أحسن انه طردنا بره الفصل علشان نعرف نشم هوا ( قال يعني جوه غازات يعني ؟ ) تعالي بقي نفوت على الفصل اللي جنبنا أما نشوف مين المدرس اللي فيه وبيعمل إيه ؟
- أهلا يا خويا أنت وهوه سايبين الفصل وجايين تعملوا إيه ؟
- والله يا أستاذ المدرس اللي في فصلنا طردنا علشان هوه عاوز يعمله منظر !!
- يعني عملته حاجة غلط ؟ ... لا ده أنا بكلم صاحبي وبقوله هات المسطرة قام طردني !!!!
- بس كده ؟ آه والله يا أستاذ ... لا غلطان ملوش حق أنا لازم أروح وأكلمه ( طبعا الكلام ده كله مع واحد مدرس معرفة أخويا الكبير ) ... لا مش مهم هوه لسه مدخلش في المنهج أساسا ... خلاص تعالوا ادخلوا هنا لغاية ما الحصة تخلص .... وندخل علشان نعرف إن العبقري الأول أحسن من العبقري ده علي الأقل الأول كان مفهوم إنما التاني كان بيتكلم على حاجة غريبة مش فاهمينها .... خير ... يوم وهيعدي !!!


وتمر بينا الحصص وإحنا طبعا مش فاهمين ولا كلمة بس بنقول طبعا فاهمين .... أمتي بقي الحصص تخلص وتيجي الفسحة ؟ ...
وفجأة بعد عذاب لمدة ثلاث حصص نسمع حاجة جميلة بتضرب ونفهم بعد تفكير عميق إن ده جرس الفسحة ... يلا يا بني آدم أنت وهوه عاوزين نروح نلعب كورة ولا حاجة ولا نعاكس أي حد معدي .... هوه إحنا مفيش عندنا حصص ألعاب ولا إيه ؟ يا سلام لو يكون فيه في الثانوية العامة تسع حصص ألعاب في الأسبوع ... لما نشوف بقيت اليوم هيخلص على إيه ؟
- طبعا الفسحة دي كانت عبارة عن فصل كامل من المناوشات الحربية يعني كان فيها إطلاق صواريخ وخناقات وجري ورا بعض لما نفسنا ينقطع .. شباب بقي هنعمل إيه ؟ ده غير طبعا الأخ اللي كان فاتح حاجة غريبة متعرفش تسميها إيه غير إنها ممكن يكون خليط من مطعم وقهوة وصالة بينج وبلياردو وطبعا الرجالة ما بتصدق تلاقي حاجة فيها تفاهة ويا سلام بقي علي سندوتشات الفول والطعمية اللي كانت بتعمل للواحد حاجة زي توقف في حركة المخ , ونخبط السندوتشات من هنا ونحبس بكوباية حبر غامق بيسموها الشاي وفجأة زي ما ضرب جرس الفسحة معلنا بدايتها يضرب مرة تانية معلنا نهايتها ودخول البقر ( عفوا : الطلاب ) إلي الفصول مرة أخري وبداية باقي التعذيب .

ودمتم

نكمل بعدين

ههههههههههههههههههههههه

جامدة الذكريات دى

الثانوية العامة مسبتش حد الا لما اثرت فيه

والله انا منساش ايام الامتحنات وتحديدا قبل دخول الامتحان وكل واحد ماسك فى ايده ملخص وعمال يراجع وبيحلم ان اللى بيقراه ده يدخل يلاقيه جوه فى ورقة الامتحان وطبعا عمر ما بيجى حاجة من اللى احنا متوقعينه او بمعنى اصح مذكرينه وده عشان احنا ايه يعنى عشان نتوقع اللى الحكومة بتفكر فيه او حتى نجاوب على اسئلتها ونبيبن قدراتنا لا لا لا طبعا احنا اخرنا درجات الرأفة الوزير يعطف ويوزع الدرجات لصالح الطلبة كده يعنى يالا اهى عدت واللحمد لله

دى بقى قصيدة منقولة عن الثانوية العامة



خلاص زهقت وفاض بيـــا .. نفســى اخلـص من الثانويه
طول السنه مذاكره وحل .. امتحانات ودروس خصوصيه


العربى نصوص وبلاغه ... والقراءه مواضيعها غبيه
والأدب خلانا اتـأدبـــــنا ... والنصوص وجعتلى عنيا


والانجليزى ترجملنا يـاسيدى .. يعنى ايه الحوار ده بالانجليزيه
وانـــا مالى ومال الكـلام ده؟ .. قلت ياهوو هاتولى الداخليه


وفى الفرنساوى انا تعبان .. وهروح اشوفلى لغه تانيه
وان مافلحتش فيها برضه .. ابقى عملت اللى عليا


والرياضه دى بقه حكايه .. جبر وتفاضل وهندسه فراغيه
وبالمكانيكا افتحلى ورشه .. واخرتى تبقى تحت العربيه


وفى التاريخ احكيلنا عالفراعنه .. وياريت لحد الحمله الفرنسيه
لأ.والفلسفه كلامها معقد .. والجيلوجيا نفس العمليه


وانا خلاص بصراحه زهقت .... امتى اقول بقه خلصت
وجبت مجموع اخر تمام .... وادخل اجدعها كليه
خلاص زهقت وفاض بيا .... نفسى اخلص من الثانويه

ههههههههههههههههههههههههههههه
جامدة القصيدة دى يا دندوووووووونه

لا اله الا الله

الثانوية خلت العيال شعراء

هههههههههههههههه

جمدة القصيدة يا قمر

تححسك بالمعاناه

ههههههههههههههههه

ههههههههههههه
ياقصايدك الجامده يادندونه وموضوع جميل جدا ياداني
ههههههههههههههه
انا بقي مواقفي لاتحصي في الثانويه اصلا ياحماعه احنا كنا بنروح الدرس عشان نجيب شيبس وكانز ونيجي ننام
ونقوم نروح المدرسه والمدرسين بقي يهزؤا فينا كل واحد شويه وانتوا المتخلفين اللي بتاخدوا دروس والكلام المعروف ده طبعا وبعدين نروح الدروس ولا احنا فاهمين اي حاجه وكان في مستر مستقصدني استقصاد جامد بس بجد ليه الفضل اني اجيب الفول مارك في التاريخ وكمان ليه مواقف مع اساتز الرياضه رسمتله مثلث في امتحان الشهر وانا كنت بليده موت في الرياضه وراح كتبلي علي المثللث ماهزا العفريت ههههههههههههههه
ومن ساعتها وانا اتعقدت من الثانويه دي ودخلت كليه الاثار دي اتعقدت اكتر ولسه بتعقد
ههههههههههههههههههههههههه

الله على الفضايح
هههههههههههههههه

لا يا نينو انا عاوزة التفاصيل كلها
من اول وانتى بتشربى الكانز لحد المثلث العفريييييييييت
( مترجعوش تقولو ا فضايح اثار )
ههههههههههههههههههه

وميرسى يا مونى وايمى على رأيكوا فى القصيدة

وبقول ايه يا نينو
فضايح بفضايح بقى
احكيلهم على الطلبة الخايبة اللى بيلعبوا اونو وكوتشينة فى المحاضرة

ومتقوليش كنت معاكوا
ههههههههههههههههههههههههههههههههههه

طب يلا بقي يا نينووووووووووو


ورينا الفضايح



هعهعهعهعه


شكل الثانوية العامة دي كان كلها فضايح


فين الناس وفضايحها

تموت انت فى الفضايح

لا بس بالنسبالى فضايح الكلية اكتر من الثانوى

ههههههههههههههههههههههه


انا وصحابى نينو ورودى منهم طبعا فى النص الاول من الدراسة مش هحكى على الاجتهاد النص التانى
كله مش طايق الكلية
بس الحقيقة احنا طلبة غير الباقى
يعنى المحاضرة متعجبناش

منحضرهاش ونتجمع ونعد مع بعض ونلعب كمان
ههههههههههههههههه

وكان فيه دكاترة بيكلموا نفسهم وهما بيشرحوا تقدروا تقولوا الدكتور داخل يراجع معلوماته مش يشرحلنا يالا ربنا يهدى

المهم النوعية دى كان الرد عليها
اننا بنعد فى البنجات الاخيرة
ونطلع الكوتشينة ونلعب
الله يعنى لا فهم ولا لعب

لو غبت بقى ابقوا اقرولى الفاتحة
رودى ونينو هيموتونى على الكلام ده

ههههههههههههههههههه

لا بس احنا فى الاخر لحقنا نفسنا
ونجحنا بتقدير كمان
اللحمد لله

هههههههههههههههههههههه
يخربيت الفضايح كده فضايح اصلي
هههههههههههههههههههه
وطبعا مكنتيش معانا خالص ده انتي ملاك يابنتي ماشي علي الارض ومتهزقتيش يا عيني خالص ولا اطردتي ابداا
هههههههههههههههههههههههههه
فضايح بفضايح بقي
عشان يعجبك

هههههههههههههههههههههههههههههههههه

لا كنت معاكوا
بس عمرى ما اطردت ولا اتهزأت ( ولا حد فيكوا برده هو يابنتى الدكتور كان بشوف او يسمع الله يرحم الموبيلات اللى كانت بتشتغل فى المحاضرة ههههههههههههههههه )

فكرتينى مرة كنت هموت واسال الدكتور على سؤال

وجتلى جرأة ورفعت ايدى


وقمت قولت السؤال
وده بالنسبالى كان انجاز بجد والله
وقولت هعد بقى

لقيت الدكتور بيقولى مسمعتش تعالى هنا قوليلى



والله كنت هموت من الاحراج انا قمت قدام كل الطلبة دى
وكمان هروح لحد عنده

المهم رحتله وعلى فكرة كان الكحلاوى يا بنات
وده دكتور كويس موت بس بغزالة يعنى

ولما رحتله وقولتله
قالى حاضر هجاوبك
كانه عيد
يقولى انا حاضر
ومهزانيش وقالى ايه الغباء ده

غلبانة انا والله
( كفاية فضايح يا اثريين بقى )

هههههههههههههههههه

معلش اتاخرت في تكملة القصة ( علي فكرة ردودي بتكون مع بعضها قصه واحدة يعني اللي عاوز يفهم يقرا من الاول وامره لله )

نكمل بقي

- صباح الخير ( يعني إيه صباح الخير ؟ ) تقولها بصوتها الجهوري وبلهجتها المسترجلة شوية ... ودي مين دي كمان ؟ شكلها بتاعة فن الطبخ !!! لا يا عم دي شكلها بتاعة التربية الرياضية !!! يا مخ أنت وهوه دي مدرسة الانجليزي اللي كانت بتدرس لأخويا ... يا حلوله دي بتاعة الانجليزي ؟ شكلها معقدة ...
- قيام .... أنا مدرسة الانجليزي بتاعتكم يا ولاد ( ما كان من بدري قبل ما صحبي يقوللي علي الأقل مكنتش اطلع جاهل !!! ) إن شاء الله هنحاول نفهم الانجليزي مع بعض وندرسه علشان أنا شايفة إنكم كلكم حمير في الانجليزي ... ( وبعدين في قلة الأدب دي ؟ بطلوا شتايم فينا بقي الله يخليكم إحنا رجالة وكبرنا خلاص علي الشتايم دي ... ) بكرة تعرفي يا أبله إن مش إحنا اللي نتشتم ....
- هيه الأبله دي متجوزة ؟
- إيه السؤال الغبي ده ؟؟ مش شايف الدبلة في الشمال !!!
- وده دليلك إنها متجوزة يعني ؟
- يا بغل أنت أصلها تبقي متجوزة واحد قريبي ....
- طب ما تقول كده من الأول بلاش فتاكة ... يعني نلم الدور ومنشتمش فيها ؟
- هوه قريبي من بعيد يعني براحتكم ...
طبعا دي كانت أول مؤامرة على المدرسين ( يعني حتي الأقارب موافقين نشتمها ) خلاص أبيح دمها ...
وعلى ده الحال تمر بينا الحصص في أول يوم دراسي في الثانوية العامة علشان نكتشف إنها خدعة كبيرة ومفيش فرق بينها وبين أي تعليم دخلناه قبل كده غير أنهم ( المدرسين يعني ) بيعملوا احترام للواحد وبيقولوا صباح الخير .
خلص أول يوم طبعا وإحنا مروحين النميمة اشتغلت , شوفت ياض المدرس بتاع العربي ؟ مال ؟ شايف كرشه عامل أزاي ؟ ولسه لما يطلبنا ناخد درس خصوصي عنده !!! آه صحيح هتروح عنده ؟ لا يا عم أنا اسمع إن المنهج عنده غالي وبعدين مش بيفهمنا كويس ... طب هنروح فين ؟ استني شوية بس لما نشوف هنعمل إيه ؟ بمناسبة الشوفان .. شفت الماتش أمبارح ؟ هوه أنا كنت فاضي !!! ليه يعني كان وراك الديوان ياخي ؟ لا أصل كان فيه حتة فيلم إنما إيه ناااااااار .... بجد ؟ بيتكلم عن إيه ؟..... و\يستمر بنا الكلام عن الفيلم وننسي أي حاجة في المدرسة ... طب وبعدين هنعمل إيه بالليل ؟ ... تيجي نروح نلعب جيم بلياردو ؟ قشطه أقابلك بالليل إن شاء الله ...
اليوم التاني :
- بقولك إيه ؟ ها ... رد عليا صحبي وهوه بيحاول يعمل منظر ويحل مسألة حسابية ميحلهاش غير الأخ اينشتاين لو كان موجود ... متيحي نلعب لعبة حلوة قوي ؟ لعبة إيه إن شاء الله ؟ بص يا سيدي هتحط أيدك علي الدرج وأنا هحاول أضربك ولو ضربتك تحط أيدك تاني .. ولو معر فتش أحط أيدي أنا .. إيه رأيك ؟ لا يا عم الأستاذ زمانه جاي !! متخافش يا عم العب بس ولو جه هناخد بالنا ... طب يلا ... وحط أيده وأنا طبعا بكل قووووووووووة .... طراااااااااااااااااااااااخ ..........( ولاد ال.......... ) اللي بيلعبوا هناك دول !!! يا نهار مش باين الأستاذ جه ... وكما كان العبقري يوسف بيه وهبي يطرد ابنه من البيت صاح الأستاذ بصوت ولا صوت الأخ مدحت شلبي لما الأهلي يجيب الجون ( برررررررررررة إحنا في الفصل ولا في الحوش ) يا أستاذ : إحنا والله كنا بنهزر .. طب معلش مش هتتكرر !! وهو راسه وألف صرمه لازم نخرج .... يلا يا عم قوم ده شراني وأنا عارفه ... بس منظرنا هيبقي نيلة قوي ... متخافش هنطلع برة المدرسة فيه واحد بتاع سندوتشات نروح ناكل ونرجع بعد الحصة ... طب يلا .
- علي فين يا أفندي منك ليه ؟ ..... يا خرابي إيه اللي جابه ده كمان ؟ طبعا ده كان مدرس التربية الدينية !! معلش يا أستاذ رايحين مشوار وجايين تاني !! تعالي أنت وهوه . اسمكم إيه ؟ وفي فصل كام ... عندكم مدرس الرياضيات دلوقتي ... آآآه ( ونظرات ذكاء عميق ترتسم علي وجهه المسن ) طب تعالوا معايا ......
- خير يا أستاذ العيال دي عملوا إيه ؟ ( برضه بيقول عيال ) ... قاعدين بيلعبوا في الفصل ومش مركزين خالص , يا أستاذ الحصة ماكنتش بدأت وقولنا نعمل حاجة مسلية .... مسلية طب ورايا !!!
اسمك وفصلك وامضي , نمضي علي إيه ؟ علي تقرير المخالفة ده .. ليه بس يا أستاذ ؟ علشان تتعلموا الأدب وتركزوا شوية ... ( يعني هيه جت علي امضه ) .. امضي يا عم علشان نخلص قبل ما الموضوع يكبر ... ومضينا واهي حصة .....

وطبعا كالعادة ...........

نكمل بعدين

ودمتم