الترقية في الشغل
طبعا دي مجموعة من الوصايا اعتقد من الافضل كلنا تبعها علشان نترقي في الشغل وربنا يستر بقي :
1 - روح لمكان شغلك بدري : علشان سيادتك لو روحت بدري اكيد هتنجز شغلك بدري وكمان ايه ( زمايلك في الشغل ) هيقلقوا يعني هيفكروا ( هوه بيعمل ايه هنا بدري كده ؟ ) وكمان دي هتبقي فرصتك تتكلم مع المدير اول ما يوصل .
2 - هز راسك علي الفاضية والمليانة : وبكده يا حلو هتخللي علاقتك موزونة مع الناس كلها في الشغل يعني لو فيه موقف معين محتاج حد يقول رايه ما تتسرعش يا جميل وهز راسك بس لغاية ما تعرف مين صاحب الرأي الاقوي وخد جانبه .
3 - أرفع راسك وامشي بسرعه : علشان طبعا لو مشيت بالراحة او قعدت تقف كل شوية هتبقي ملكش لازمة يا حدق بس لو مشيت بسرعه الناس هتفتكرك مهم وممكن كمان يفكروا ان المدير مكلفك بشغلانه مهمه جدا .
4 - النصيحة دي بقي فيها شوية غلاسة بس لازم منها
يعني من الاخر حاول كل يوم كده تقعد تنتقد في ده وتقول كلام كويس عن ده وممكن ده يدي لزمايلك احساس انك شخصية واصلة وعارف كل حاجة وطبعا كله هيجري علشان يبوس الايادي .
5 - حط مناخيرك في كل حاجة : يعني اي مشكلة او موضوع محتاج لرأي من أي نوع يبقي انت بقي البطل اللي هيحلها وعنده جميع انواع الحلول وطبعا المدير في اي موقف هيدور علي سيادتك علشان ياخد برايه .
6 - سجل كل حاجة يوم بيوم : يعني اي موقف او شغل او موضوع يحصل حاول بقي يا امور تسجله ولو حتي في ورقة قديمة ومين عارف ممكن ييجي اليوم اللي تحتاج فيه الورقة دي علشان تثبت حاجة او تفتكر حاجة .
7 - مينضحكش عليك بسهولة : يعني مش تبقي عامل فيها زي المدب ينضحك عليك بكلمة ( يعني كلمة توديك وكلمة تجيبك ) لا يا عم خليك مفتح ورايك في الاخر يكون من دماغك ومحدش يأثر عليك بالساهل .
بقولكم ايه .... انا من رايي محدش ياخد بالكلام ده وخليك يا عم انت وهيه في حالك واعتبر ده تخاريف من واحد ما شفش ترقية ومش هيشوفها ابدا لو سمع الكلام ده او نفذه بلاش وجع دماغ ماله اللي احنا فيه ؟؟؟
يعني عيشة زي الفل والحياة حلوة وممكن الواحد فينا يقعد في الشغل سبعين سنه علي ما يبقي حاجة مهمة وممكن لما تيجي يكون الناس ساعتها بيقولوا الله يرحمه كان احسن واحد ممكن يمسك المكان ده .... و........
ودمتم
regards
